Barents IAS

Fidnu mihttomearri lea aktiveret Barentsguovllu riikkavuložiid ja báikkálaš doaibmiid goahcat vahátlaš vierisšlájaid. Fidnu guovddážis leat vierisšlájat ja ruoššaluossa. Fidnu bargá Barentsguovllus Norggas, Ruoŧas ja Suomas.

Vahátlaš vierisšládjašattuid stivren

Fidnu guovddážis leat gilvva- ja alaskalupiidna ja stuorraboskajoavku (armeniaboska, kaukasiaboska ja romssaboska). Vierisšládjašattuid doaimmaid leat ollašuhttimin fidnu ovttasbargoguoimmit WWF ja Maa- ja kotitalousnaiset (Eanan- ja ruovttodoallonissonat). Fidnus buvttaduvvojit gulahallanmateriálat, dego rávagirjjážat ja filmmat, mat ovdanbuktet buoremus vugiid caggat vahátlaš vierisšládjašattuid. Riikkavuložiidda ja báikkálaš- ja gieldadoaibmiide lágiduvvojit vierisšládjašattuid birra webinárat ja skuvlejumit. Mii dieđihat boahttevaš dáhpáhusain ja almmustahttit buot buvttaduvvon materiálaid dán fidnu neahttasiidduin.

Ruoššaluosa bivdovugiid gárgeheapmi

Fidnus gárgehuvvojit ja testejuvvojit ruoššaluosa bivdometodat Suoma ja Norgga rádjáeanus, Deanus. Gárgehanbargu sisttisdoallá ovttasbarggu dutkiid, báikkálaš guolásteaddjiid, eará doaibmiid ja Suoma ja Norgga beale virgeoapmahaččaid gaskkas. Ovttasbargu čiekŋu eanaš bivdovugiid gárgeheapmái Deanus, muhto ovttasbargu čađahuvvo maiddái viidásabbot ovdamearkka dihtii Suoma ja Norgga rádjáeanus, Njávdánjogas.

Ovttasbargofierpmádaga ovddideapmi

Min mihttomearrin lea hábmet riikkaidgaskasaš ovttasbargofierpmádaga, mii ovddida Suoma, Ruoŧa ja Norgga vierisšládjaáššiid. Ulbmilin lea juogadit máhtu vierisšlájaid cagganbarggus ja ovddidit vierisšládjaáššiid maiddái guhkit áiggis. Fierpmádahkii ohccojuvvojit erenomážit iešguđetlágan areála doaibmit, dego virgeoapmahaččat, gielddat, organisašuvnnat, searvvit ja dutkanásahusat.