Jagi álggogeahčen Barentsguovllu vierisšládjafidnus čađahuvvui stuorra gilvalahttinollisvuohta, man ulbmilin lei oažžut vierisšládjašaddodoaibmiid fidnui. Gilvalahttin sisttisdoalai guokte iešguđet oasi, mas nubbi čieŋui materiálii, mii buvttaduvvo riikkavuložiidda ja nubbi doaimmaide, mat ovddidit eaktodáhtolaš barggu ja buvttaduvvojit gielda- ja báikkálašdoaibmiide. Seammá doaibmi oaččui guođđit goappáge oassái fálaldaga, nappo fidnus livččii sáhttán leat okta ođđa ovttasbargoguoibmi, gii livččii vástidan goappáge oasis. Dán vuoro oasit manne iešguđet doaibmiide ja Barents-fidnu oaččui guokte vierisšládjadoaibmi: WWF ja Maa- ja kotitalousnaiset.
Diehtopáhkat riikkavuložiidda ja cagganbargu báikkálaš doaibmiide
WWF buvttada čuovvovaš beannot jagi áigge Barentsguovllu vierisšládjafidnus riikkavuložiidda čujuhuvvon materiála ja skuvlejumiid. Geasset 2023 govvejuvvojit materiálat, mat laktásit vierisšládjafidnuide ja davvi lundui. Materiálas buvttaduvvo oanehis skuvlenfilmmažiid ráidu. Filmmat tekstejuvvojit, vai daid sáhttá čuovvut sihke suoma-, ruoŧa- ja dárogillii. WWF buvttada maiddái skuvlenmateriála teakstahámis ja lágida neahttaskuvlejumiid ja ovdamearkka dihtii riikkaidgaskasaš vierisšládjawebinára.
Rural Women’s Advisory Organization (Eanan- ja ruovttodoallonissonat) oassi lea lagabus praktihka ja dan váldodeaddu lea doaimmain, mat dorjot vierisšládjašattuid caggama. Ulbmil lea oahpásmuvvat iešguđet riikkaid vierisšattuid caggangeavadagaide, ordnet cagganbarggu bargočájáhusaid ja ovddidit cagganbarggu skuvlemiin doaibmiid. Dákkár doaimmat dárbbašuvvojit, daningo ovdamearkka dihtii Suomas leat juo hárjánan lágidit eaktodáhtolaš vierisšládjabarggu, muhto Ruoŧas ii leat seammalágan eaktodáhtolaš bargiid kultuvra. Riikkaidgaskasaš jurdagiid ja vásáhusaid juogadeapmi leage fidnu okta dehálamos mihttomeriin!
Aiddo dál WWF ja Eanan- ja ruovttodoallonissonat doaimmaid plánejit movtta ja dat dárkkálmuvvet geasi 2023 mielde. Lea sihkkar, ahte doaimmat čuhcet alaskalupiinnaide, gilvvalupiidnii ja stuorraboskkaide, muhto earáge šlájaid soitet čalmmustahttit, go fidnu ovdána. Riikkaidgaskasaš ovttasbargu dárbbašuvvo, daningo vierisšládjašattut eai dovdda stáhtaid rájáid. Boahttevaš dáhpáhusain ja ođđa materiálain dieđihuvvo fidnu neahttasiidduin ja Twitteris!
WWF ja Rural Women’s Advisory Organization (Eanan- ja ruovttodoallonissonat) leat oassi Luondduriggodatguovddáža Barentsguovllu vierisšládjafidnus. Fidnu doaibmá Suoma, Ruoŧa ja Norgga Barentsguovllus ja figgá buvttadit dieđuid vihtta gillii: suomagillii, ruoŧagillii, dárogillii, davvisámegillii ja eaŋgalasgillii.