Viimmat! Mii leat rahčan oppa álgojagi dáiguin neahttasiidduiguin, gilvalahttimiiguin ja eará háhkamiiguin, ja dál dat oidnošgoahtá maiddái olggobeallái. Rievtti mielde oassi fidnus, namalassii ruoššaluossaoassi, lea vuolggahuvvon juo jagi 2022 geassemánus. Luondduriggodatguovddáža dutkit Jaakko Erkinaro ja Panu Orell leaba joavkkuineaskka gárgehan ruoššaluosaide heivvolaš bivdovugiid. Dán gease dáid bivdometodaid áigot testet duohta dilis, go Detnui vurdet juoba beallemiljovdna ruoššaluosa gođđat.
Dál mis álgá fidnus muddu, man guovddážis leat vierisšládjašattut. Dárkilabbot daddjon, mii bargat alaskalupiinnain ja gilvvalupiinnain, mii láve deavdit geaidnoguoraid geasset violehtta ivnniin. Dasa lassin fidnu guovddážis leat stuorraboskkat, maid golbma iešguđet šlája lea váttis earuhit nubbi nuppis. Njukčamánus almmustahtton neahttasiiddut (ja Twitter-kontu!) leat vuosttamuš oinnolaš oassi fidnus. Giđa áigge gilvalahttima bokte válljejuvvon doaibmi ollašuhttigoahtá máŋggalágan skuvlenmateriála ja dilálašvuođaid lupiinnaid ja stuorraboskkaid birra. Nappo mii oidnošgoahtit dađi eanet, mađi guhkkelabbui min fidnu ovdána.
Mii leat dan dáfus erenomáš fidnu, ahte mii geahččalit hábmet materiálaid viđa iešguđet gillii. Visot ii dieđus álgage sáhte jorgalit buot gielaide ja ovdamearkka dihtii live-dáhpáhusat lágiduvvojit ovtta dahje guovtti gillii. Mii geavahit goittotge vejolašvuođaid mielde suoma-, ruoŧa-, dáro-, davvisáme- ja eaŋgalasgiela. Neahttasiiddut bohtet buot gielaide.
Min fidnu bistá 6/2022-12/2024. Juos leat priváhttaolmmoš, de čuovo min Twitter-konttu ja neahttasiidduid! Mii gulahallat maiddái nuppi some-kanála bokte, go fal leat mearridan, mii livččii buot buoremus some-molssaeaktu. Báikkálaš ja gieldadoaibmit leat maiddái buresboahtán searvat min e-poastalistui, man bokte mii dieđihat áigeguovdilis áššiin ja hukset báikkálaš doaibmiiguin ovttasbargofierpmádaga.
Čuovo mielde, gulat min birra fas farga!